Death, be not proud, though some have called thee
Mighty and dreadful, for, thou art not so;
One short sleep past, we wake eternally,
And death shall be no more; death, thou shalt die.

Skohé for di John Donne su "Divine Poems", e promé 2 i último 2 frasenan di su poema imortal: "Death be not proud". E ta un di e poetenan metafisiko ku a biba di 1572 te 1631.

Pèrmití mi kombiná e pensamentu di John Donne su famoso poema ku e siguiente frasenan ku m'a skirbi pa e anunsio di morto di mi amigu Norbert, of Nòps, manera nos tabata yam'é:

"B'a kana piki rekuerdo di Otrobanda
pa dòrna nos bida k'e nostalgia di su pasado.
Awor bo mes a bira parti di su glorioso historia."

(Zwervend langs de paden van Otrobanda's verleden
heb je herinneringen opgeraapt om het heden te versieren.
Nu ben je zelf deel van haar bloemrijke geschiedenis.)

E introdukshon aki ta enfantisá e sentido di eternidat ku nos komo Kristian i hende kreyente ta asosiá ku bida & morto. Ta den e kuadro aki mi ke papia riba nos amigu Nòps. Nos a lanta den un Otrobanda den añanan 40 & 50, tempu ku Otrobanda tabatin mas o menos 8000 habitante for di Awasá te na bario di San Mateo, inkluso Dòmi Abou & Juan Domingo. Otrobanda tabata konosé diferente sup-bario, kada unu ku su mes karakter típiko. Nòps tabat mucha di Witteweg, Kortijn, San Mateo, bin pariba bin topa ku Belvedère i "Seru di Otrobanda".
E bida den e bario dje tempu ayá tabata un meskla di alhun hende di moda, un klase media basta reimu i un mayoria di hende di menos rekurso. Bo tabata interkambiá ku tur sorto di rasa, koló & idioma, i sin konflikto, pasobra e gran mayoria tabata tene su mes na e reglanan invisibel, pero firmemente hankrá den e kustumber dje tempu ayá. Bo tabata tene kuenta ku bo bisiña, bo tabata mustra rèspèt pa hende grandi i fratu ku sùr tabata pone òrdu, i mayornan tabata purba di mantené e òrdu & disiplina aki tambe na kas. Famianan tabata bishitá otro, spesialmente durante dianan di fiesta, manera Pasku & Aña Nobo. Tabatin un sentido di konbibensia, di pertenesé, di ta forma un komunidat. Esaki ya a bin desaparesé den e último dékadanan, ora e famianan di antes a muda bai biba pafó di sentro di siudat, i hopi estrahero a bin konsentrá den e bario. E neglisensha di añanan '60 pa '80, tantu físikamente komo soshal- i kulturalmente, a duna inisio na un movimentu di parti di Otrobandistanan pa yuda e bario rekobrá su gloria di antes. Hopi a keda hasí I awor Otrobanda konosé hopi edifisio restorá i e kantidat di habitantenan a subi di apenas 1300 den e senso di '74 te ku mas o menos 4000. I e interés den e bario ta kresiendo.

E importansia di Nòps den henter e asuntu aki ta ku el a deskribí na un manera ekselente e Otrobanda dje tempu ayá, su hendenan i e kustumbernan, di moda ku awe nos por tin un bon idea kon bida tabata den aña '30 te '60. Esaki ta algu invaluable, pasobra e ta krea un kuadro ku awe nos por uza pa re-establesé & re-integrá e poblashon den e Otrobanda di awe i mañan.
Ta pesei Nòps ta sigui biba den kurason di hopi Otrobandista, ku lo sinta su presensia den nos hanchinan, nos kuránan. Kisas, den nos pensamentu, nos por mirele kana rònt piki historia i deskribí Otrobanda ora mardugá parti poema riba e daknan dje bario, ora solo kima den sombra dje murayanan dje kasnan biew i kansá, ora den silensio di atardi promé ku sukuritu drenta, chuchubi kanta despedida te ora nochi tapa e bario ku e mistisimo di su presensia.
Pesei mi ta bisa, sosegá na pas, ruman, ora bo sigui biba den skochi di bo kerido Otrobanda.

Jopi Hart
Kòrsou. 2 di yüni